Apni Ye Duniya...!!

A poem dedicated 2 friendz.
CHEERS!!

Ye sapno ki duniya,
Ye apno ki duniya,
Ye yaaro ki mehfil,
Hai apni ye duniya.

Yaaron sang masti,
Wo ghoomna, wo phirna,
Naadaniyon se bhari,
Hai apni ye duniya.

Kuchh sambhle, kuchh bigade,
Kuchh khoya, kuchh paya,
Yaaron bin adhoori,
Hai apni ye duniya.

Family se door,
Ek family hai humari.
Sabse alag,
Hai apni ye duniya.
Thandi hawayien,
Humse ye poonchhein,
Yaron ke bin,
Hogi kaisi ye duniya!!

Tanha Sa Main...!!

Main anayas hi,
Fizool samjhe jaane wale vicharo me doob jaata hun.
Sukh se utsahit, aur dukh se nirash logo ke beech,
Aksar khud ko tanha sa pata hun.

Kisi ki khushiyon me shamil hone se katrata hun,
Unki khushiyo se khush main bhi hun,
Ye jatane se ghabrata hun.
Khushiyon ki dambh-agni me mera atm-samman na jhulas jaye,
Isliye sirf muskurate hue, tanhai ke raste guzar jata hun.
Main anayas hi..

Kisi ke aasuon ko pochhne jaate hue,
Thithak jata hun.
Unke ghavon ko kahin fir hara na kar jaoon,
Is vichar se saham jata hun.
Fizool se vicharo ke dvandva ke beech,
Main khud ki nazaron me gunahgar sa ban jaata hun.
Main anayas hi..

Ek or main,
Ek or mere apne hain.
Ek or mere farz,
Ek or mere sapne hain.
Is char-diwari me jeewan ki rah talashte hue,
Main aksar antah-dvandva me doob jaata hun.
Main anayas hi,
Fizool samjhe jaane wale vichaon me doob jaata hun.
Sukh se utsahit, aur dukh se nirash logo ke beech,
Aksar khud ko tanha sa pata hun!!